Саха сирин министиэристибэлэригэр 129 штат сарбылынна

Ил Дархан Айсен Николаев ыйааҕынан судаарыстыбаннай былаас толоруулаах уорганнарыгар 129 штатнай единица сарбылынна. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Тустаах ыйаах бүгүн, ахсынньы 16 күнүгэр, Ил Дархан 2019 сыллааҕы тосхоллорун тутаах балаһаларын чэрчитинэн бигэргэннэ. Өрөспүүбүлүкэ баһылыга Ил Түмэҥҥэ туһаайыытыгар судаарыстыбаннай уонна муниципальнай үлэһит ахсаанын үс сыл устата 30 %-н аччатар туһунан иһитиннэрбитэ.

Саха өрөспүүбүлүкэтин баһылыгын уонна бырабыыталыстыбатын дьаһалтатын үлэһиттэрин ахсаана бэҕэһээ 33 үлэһитинэн аччаата.

«Бүгүн Ил Дархан министиэристибэлэр уонна биэдэмистибэлэр таһымнарыгар тустаах быһаарыыны ылла. Туспа эбээһинэстэр судаарыстыбаннай былаас толоруулаах уорганнарын икки ардыларынан үллэриллиэхтэрэ. Ону тэҥэ хааччыйар эбээһинэстэри толорор үлэһиттэр судаарыстыбаннай былаас уорганнарын систиэмэтиттэн аннынааҕы судаарыстыбаннай казеннай тэрилтэлэргэ көһөрүллүөхтэрэ», – диэн СӨ баһылыгын уонна бырабыыталыстыбатын дьаһалтатын салайааччыта Афанасий Владимиров эттэ.

Ил Дархан Айсен Николаев өрөспүүбүлүкэ министиэристибэлэригэр уонна биэдэмистибэлэригэр ыйдааҕы болдьоххо тутулу уонна штатнай расписаниены ылыллыбыт докумуоҥҥа эппиэттиир гына оҥорорго соруйда.