Саха сирин музыкальнай тэрилтэлэрэ 5 мөл.солк. гран ыллылар

Саха сирин музыкальнай тэрилтэлэрэ өрөспүүбүлүкэ Ил Дарханын уонна бырабыыталыстыбатын биэс мөлүйүөн солкуобайдаах гранын ыллылар. Бу туһунан СӨ култуураҕа министиэристибэтин пресс-сулууспата иһитиннэрэр.

Алтынньы 1 күнүгэр Дьокуускай куоракка «Дьүкээбил уота» норуоттар икки ардыларынааҕа Арктикатааҕы музыка бэстибээлэ саҕаланна. Бэстибээл үөрүүлээх аһыллыытыгар музыка искуустубатын куонкуругар кыайбыт Саха сирин култууратын тэрилтэлэригэр граннар туттарылыннылар.

«Бу өрөспүүбүлүкэ Ил Дарханын уонна бырабыыталыстыбатын бэрэссэдээтэлин быһаарыыта буолар — төһө да уустук кэм буолбутун иһин, биһиги музыкальнай кэллэктииптэрбитин өйүүргэ. Бу граннар саҥа инструменнарга, саҥа дорҕооннорго уонна куоластарга ыытыллыахтара», — диэн СӨ култуураҕа уонна духуобунай сайдыыга миниистирэ Юрий Куприянов эттэ.

Өрөспүүбүлүкэтээҕи судаарыстыбаннай филармония үс мөлүйүөн солкуобайдаах гран ылла. «Саха сирин виртуозтара» скрипка ансаамбыла уонна «Туймаада» вокальнай ансаамбыл 750 тыһыынча солкуобай кээмэйдээх граннары ыллылар. Эстрада судаарыстыбанай тыйаатырыгар — 500 тыһыынча солкуобайдаах гран бэрилиннэ.