Саха сирин оҕолоро Анапа чэбдигирдэр лааҕырыгар көттүлэр

Өрөспүүбүлүкэ арктическай улуустарыттан 60 оҕо «Зори Анапы» чэбдигирдэр лааҕырга көттүлэр. Бу туһунан Арктика уонна Хотугу норуоттар сайдыыларын министиэристибэтэ иһитиннэрэр.

«Дойдуга эпидемиологическай балаһыанньа бигэтийбитин кэннэ «күөх көрүдүөрүнэн» (туора дьону кытта алтыспакка) Россия сайыҥҥы чэбдигирдэр лааҕырдарыгар көппүт бу бастакы оҕолор бөлөхтөрө буолар», — диэн иһитиннэриигэ этиллэр.

Бөлөх састаабыгар, 7 — тэн 17 — гэр дылы саастаах, уопсайа 60 оҕо Абый, Анаабыр, Эдьигээн, Орто Халыма, Өлөөн, Эбээн-Бытантай улуустарыттан киирдилэр.

Анапаҕа айан кэмигэр бастаан санитарнай-эпидемиологическай ирдэбиллэргэ эппиэттиир «Бэс чагда» киинигэр тохтоотулар. «Бэс чагдаҕа» олорбут кэмнэригэр «Душа Севера» баһаатайдар этэрээттэрэ аралдьытар тэрээһиннэри ыытта.

«Зори Анапы» чэбдигирдэр лааҕырга оҕолор үс нэдиэлэ сынньаныахтара. Аныгыс арктическай улуустар оҕолорун бөлөҕө атырдьах ыйын 12 күнүгэр көтөллөрө былааннанар.