Саха сирин оскуолалара үгэс буолбут көрүҥүнэн үөрэтиигэ төннүөхтэрэ

Саха сирин оскуолалара уонна уһуйааннара үгэс буолбут быһыынан үлэлэрин саҕалыахтара. Үөрэх куттала суох буолуутун хааччыйарга ханнык миэрэлэр баар буолалларын туһунан өрөспүүбүлүкэ бырабыыталыстыбатын бэрэссэдээтэлин солбуйааччы э.т. Сергей Местников уонна СӨ үөрэҕириигэ миниистирэ Михаил Сивцев иһитиннэрдилэр.

Дойду үрдүнэн үөрэх дьыла олохтоммут быһыынан саҕаланыаҕа — бары үөрэнээччилэр оскуолаҕа барыахтара.

«Бу быһаарыы федеральнай таһымҥа ылылынна, онон Саха сирин оскуолалара эмиэ балаҕан ыйын 1 күнүттэн арыллыахтара. Биллэн турар куттал суох буолуутун уонна Роспотребнадзор булгуччу ирдиир нуормаларыгар тутуһан туран», — диэн Сергей Местников эттэ.

Саҥа быраабылаларынан үөрэх тэрилтэлэригэр сылдьааччылартан барыларыттан ирдэнэр:
— илиини булгуччу дезинфекциялыы сылдьыы уонна бэйэ гигиенатын тутуһуу;
— «сарсыардааҥҥы фильтыры» аһыы — киириигэ булгуччу кыраадыһы кэмнээһин;
— рециркулятордарынан уонна санитарнай уктарынан хааччыйыы.

Мааскалаах сылдьыы эрэһиимэ аһы астыыр уонна тарҕатар, ону тэҥэ ырааһы хааччыйар үлэһиттэргэ эрэ булгуччулаах буолуоҕа.

Үөрэнэр кылаастары уонна атын хостору дезинфекциялааһын ыытыллар буолуоҕа. Үөрэнээччилэр биир сиргэ элбэх буолан тоҕуоруһууларын сэрэтэр сыалтан үөрэх процеһа тус-туспа ыытыллар буолуоҕа. Атын-атын кылаастар уруоктара араас кэмҥэ саҕаланар буолуоҕа: 8:00 чаастан, 8:30 чаастан эбэтэр 9:00 чаастан.

Өрөспүүбүлүкэ 649 оскуолатыттан — 87 %-на үөрэҕи иккис, үһүс симиэнэҕэ көһүүтэ суох тэрийэргэ бэлэм.

«Оскуолалар улахан аҥардара үөрэх хаамыытын саҥа ирдэбилинэн саҕалыырга бэлэм. Хаалбыт 13% — элбэх оҕо үөрэнэр оскуолалара. Баларга балаһыанньа уустук, хас биирдии оскуолаҕа анаан саҥа биэс араас киэп бэлэмнээннэ. Бу киэптэринэн үөрэх хаамыыта тэриллиэҕэ», — диэн Сергей Местников иһитиннэрдэ.

СӨ үөрэҕириигэ миниистирэ үс симиэнэнэн үөрэтии — муҥутуур миэрэ буоларын бэлиэтээтэ. Бэлэмнэммит моделлары бэлэмнээһиҥҥэ үөрэҕирии салаатын тэрилтэлэрин салайааччылара уонна оскуолалар дириэктэрдэрэ кыттыыны ылбыттарын бэлиэтээтэ.

«Бу моделлар бары оскуолаларга сөп түбэспэттэр, ол да буоллар биһиги үөрэх хаамыытын тэрийии араас көрүҥүн бэлэмниибит — бары оскуолалар тэҥ буолбатахтар. Үөрэх очнай быһыыта дойду үрдүнэн булгуччулаах, онон биһиги сорукпут — үөрэх тэрилтэтин иһигэр куттала суох усулуобуйаны тэрийии», — диэн кини эттэ.

Дьиэттэн үөрэтии ньымата ханнык эмит үөрэх предметин уларытыыга буолбакка, үөрэнээччилэр биир сиргэ элбэх буолан тоҕуоруһууларын аччатыыга эрэ туһаныллыан сөптөөҕүн Михаила Сивцев тоһоҕолоото.

«Иккис долгун — бу биһиги көрсүөхпүтүн баҕарбат саамай улахан кутталбыт. Билигин ордук суолталааҕынан ыарыы тарҕаныытын сэрэтиигэ туһаныллар быһыы-майгы хайысхата буолар. Оскуолаларбытын сүһүөхтэринэн аччатыахтаахпыт. Роспотребнадзор ирдэбилинэн маассабай тэрээһиннэри ыытыы бобуллар. Биллэн турар, оскуола линейкэлэрин аҕыйахтыы бөлөхтөрүнэн уонна кылаастарынан тэрийиэххэ сөп. Онтон атын миэрэлэр регионҥа бэлиэтэнэр эпидемиологическай балаһыанньаттан тутулуктаахтар. Дьокуускай куораты ыллахха, манна элбэх дьону түмэр усулуобуйа баар, ол эрээри, биллэн турар, өйдөөх быһаарыылары ылыныахха наада. Биһиэхэ саамай сүрүнүнэн оҕолор доруобай буолууларын хааччыйыы», — диэн үөрэҕирии миниистирэ эттэ.

Оскуолалары үөрэх дьылыгар бэлэмнээһин былааннаммыт эрэһииминэн ыытыллар. Бастакы нэдиэлэлэргэ оскуолаларга медицинскэй үлэһиттэр баар буолуохтара. Билигин аны оскуолаҕа туттарсыыга ураты медицинскэй туоһулааыннары ааһыы, ыспыраапкалары тириэрдии ирдэммэттэр.

«Төрөппүттэр оҕолору социальнай арыты уонна гигиена быраабылаларын тутуһа сылдьыыга хайдах настройдуулларыттан олус элбэх тутулуктаах. Төрөппүт маннык миэрэлэргэ сыһыана оҕолорго сиэркилэ курдук көстөр. Бары төрөппүттэри оҕолорго бары ирдэбиллэри тутуһуу булгуччулааҕын уонна суолталааҕын өйдөтөргө ыҥырабыт», — диэн Местников тоһоҕолоото.

Оҕо уһуйааннара эмиэ Роспотребнадзор бары ирдэбиллэрин тутуһан арыллаллара былааннанар. Манна эмиэ булгуччулаах бэрээдэктэр олохтонуохтара: сарсыардааҥҥы температура кэмнээһинээ уонна көрүүлэри оҥоруу. Оҕолор бэйэлэрин бөлөхтөрүн иһигэр сылдьыылара. Уопсай хосторго ыытыллыбыт дьарыктар кэннилэриттэн булгуччулаах дезинфекция.

Орто уонна үрдүк үөрэх кыһаларыгар эмиэ үлэлэрин саҕалыыллара былааннанар. Ол эрээри баларга очнай, очнай-дистанционнай уонна дистанционнай үөрэх ньымалара бэлэмнэннилэр. Түмүк быһаарыы регион эпидемиологическай балаһыанньатыттан көрөн ылыллыаҕа.