Саха сирин оскуолаларын кылаас салайааччыларыгар эбии биэс тыһыынча солкуобай төлөнүө

2020 сыл балаҕан ыйын 1 күнүттэн өрөспүүбүлүкэ уопсай үөрэхтээһин оскуолаларын кылаас салайааччылара эбии биэс тыһыынча солкуобай төлөбүрү ылар буолуохтара. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Ол тухары өрөспүүбүлүкэтээҕи төлөбүр оннунан хааларын туһунан Саха сирин үөрэҕириитин миниистирэ Владимир Егоров бэлиэтээтэ.

«Өрөспүүбүлүкэҕэ тоҕус тыһыынчаттан тахса кылаас салайааччыта ааҕыллар, хас биирдиилэрэ өрөспүүбүлүкэтээҕи төлөбүрдэригэр эбии биэс тыһыынча солкуобай төлөнөр буолуоҕа. Билигин Саха сиригэр хас кэлим кылаас уонна кылаас салайааччыта баарын туһааннаах министиэристибэлэр ааҕаллар», — диэн Владимир Егоров эттэ.

Төлөбүр кээмэйэ үөрэҕирии кэрдииһиттэн, учуутал акылаатаатыттан, хотугу уонна оройуоннааҕы коэффициениттэн, оҕо ахсааныттан тутулуктааҕын туһунан миниистир быһаарда.

Бэрэсидьиэн Владимир Путин Россия оскуолаларын кылааһын салайааччыларыгар бэдэрээлинэй үбүлээһинтэн биэс тыһыынча солкуобайтан аҕыйаҕа суох эбии төлөбүр көрүллүөхтээҕин туһунан сорудаҕын Бэдэрээлинэй мунньахха иһитиннэрбитэ.