Саха сирин өрүстэрин 77 учаастагар мууһу кэбирэтии ыытыллыаҕа

Саха сирин өрүстэрин 77 харыы үөскүөн сөптөөх учаастагар сааскы халаан куттала суох аһарын туһугар бэлэмнэнэн, мууһу кэбирэтии ыытыллыаҕа. Бу туһунан СӨ баһылгын уонна бырабыыталыстыбатын дьаһалтатын пресс-сулууспата иһитиннэрэр.

«2021 сылга кыра үрэхтэргэ хаар халыҥа бэлиэтэнэр, бу халааҥҥа тиэрдиэн сөп. Муус халыҥын туһунан этэр буоллахха, Өлүөнэ, Алдан, Халыма өрүстэр сорох учаастактарыгар көрдөрүү нуорманы 10-40 сантиметр куоһарар», — диэн этиллэр.

77 харыы үөскүөн сөптөөх учаастагар уопсайа 31,7 мөлүйүөн солкуобай кээмэйдээх мууһу кэбирэтии үлэтэ ыытыллара бэлиэтэнэр. Кэтиир көтүүлэргэ уонна разведкаҕа анаан гражданскай авиация 10 уонна ЫБММ биир салгын суудуната көтүөҕэ.

Өрөспүүбүлүкэ 24 улууһугар 123 нэһилиэнньэлээх пууҥҥа халаан ылыан сөптөөх учаастактара барыллаан бэлиэтэннилэр.