Саха сирин үрдүнэн умайбыт эбийиэк 2009 сыллаахха ыытыллыбыт «Фрегат» разгон булуога буолуон сөп

Өрөспүүбүлүкэ үрдүнэн салгыҥҥа умайбыт эбийиэк, 2009 сылга орбитаҕа араас дойдулар спутниктарын таһаарбыт «Фрегат» разгон булуога буолуон сөп. Бу туһунан ТАСС иһитиннэрэр.

«Космос куйаарын уонна сир икки ардынааҕы эйгэҕэ кутталлаах быһыыны-майгыны сэрэтэр сүрүн иһитиннэрэр-ырытыр автоматизированнай систиэмэ биллэрбитинэн, салгыҥҥа умайбыт эбийиэк разгоннай булуок буолуон сөбө сабаҕаланар», — диэн Роскосмос суруналыыстарга иһитиннэрдэ.

Разгоннай булуоктаах «Союз-2.1» ракета 2009 сыллаахха араас судаарыстыбалар космическай аппарааттарын бөлөҕүн кытта көтүтүллүбүтүн туһунан Роскосмоска чуолкайдаан эттилэр.  

Санатан эттэххэ, социальнай ситимнэргэ, Уус Ньара бөһүөлэгин үрдүнэн халлааҥҥа биллибэт эбийиэк умайбытын туоһулуур видео тарҕаммыта.