Саха сирин салалтата учуонайдары уонна госкорпорациялары кытта сүбэ мунньах ыытыаҕа

Саха сирин салалтата научнай үөрэҕирии киинин олохтонуутун боппуруостарынан учуонайдары уонна өрөспүүбүлүкэҕэ үлэлиир хампаанньалар, ол иһигэр госкорпорациялар бэрэстэбиитэллэрин кытта көрсүһүөҕэ. Бу туһунан ТАСС иһитиннэрэр.

Россия бэрэсидьиэнэ Владимир Путин дойду сүбэ мунньаҕын уонна наукаҕа уонна үөрэҕириигэ сүбэ салалтатын кытта холбоһуктаах мунньах кэмигэр, бырабыыталыстыба иннигэр регионнарга үрдүк үөрэх систиэмэтин сайыннарыыга болҕомтону уурарга сорук туруорда.

«… аан дойду таһымнаах научнай үөрэҕирии киинин олохтооһун туһунан сайаапкабытын ситэриэхпит. Биһиги научнай үөрэҕириибит киинэ региональнай таһымнаах, Уһук Илиҥҥи уокурук сорох регионнара кыттыһарга бэлэмнэр. Ону тэҥэ бу регионнарга үлэлиир хампаанньалар эмиэ киирсиэхтэрэ. Госсовет иннигэр туруоруллар соругунан үлэ хайыы үйэ барар», — диэн Ил Дархан Айсен Николаев эттэ.

Бу кииҥҥэ Уһук Илиҥҥи уокурук түөрт регионун хабара сабаҕаланар: Саха сирин, Камчатскай кыраайы, Магадан уобалаһын уонна Чукуотка автономнай уокуругун. Саха сирэ аан дойду таһымнаах научнай үөрэҕирии киинин олохтуур туһунан сайаапката бигэргэммэтэҕинэ, бырайыак региональнай таһымҥа олоххо киириэҕэ.

Россияҕа «Наука» национальнай бырайыык иитинэн ыытыллар «Научнай уонна научнай-производственнай холбоһугу сайыннарыы» бырайыак чэрчитинэн 15-тэн аҕыйаҕа суох аан дойду таһымнаах научнай үөрэҕирии кииннэрин тэрийии былааннанар.

«Наука» национальнай бырайыак дойду баһылыга Владимир Путин ыам ыйдааҕы туһаайыытыгар олоҕуран төрүттэммитэ. Бырайыак соругунан 2024 сылга диэри научнай-технологическай сайдыы тэтимигэр сөп түбэһэр хайысхаларынан, Россия научнай чинчийиилэрин уонна арыйыыларын таһыма аан дойдуга биэс бастыҥ ахсааныгар киириитэ буолар.