Саха сирин сэлии киинигэр холонуу аукцион ыытылынна

Өрөспүүбүлүкэтээҕи сэлии киинигэр, сэлии муоһун эргиэнигэр маҥнайгы холонуу электроннай аукциона ыытыллыбытын туһанан, СӨ бырабыыталыстыбатын бэрэссэдээтэлэ Владимир Солодов иһитиннэрдэ. Бу туһунан ТАСС тириэрдэр.

«Биһиги электроннай эргиэн маҥнайгы холонуу туоргун ыыттан көрдүбүт. Билигин хайдах быһыылаах уонна киэптээх үлэлиирбитин быһаарыныахпыт», — диэн Владимир Солодов эттэ.

2019 сыл саас, СӨ бырабыыталыстыбата сэлии муоһун хостооһун, оҥорон таһаарыы уонна эргиэн хайысхатыгар хонтуруол олохтуурга, Өрөспүүбүлүкэтээҕи мамонт киинин тэрийии туһунан иһитиннэрбитэ. Саҥа киин көҥүллээх эргиэни чэпчэтиини уонна аукционнарга сэлии муоһун сөпкө сыаналааһыны олохтуура сабаҕаланар. Хостооччулар булбут сэлии муостарын, бу кииҥҥэ туттарыахтарын сөп буолуоҕа. Муос уопсай сыанатыттан кыра быраһыана бу киин үлэтин хааччыйыыга тутуллуо, ордуга толору булбут киһиэхэ төлөнүөҕэ.

«Сэлии киинин оҥоруу үгүс сокуон уонна да атын мэһэйдэри кытта тиксиһэр. Билигин сокуон олоххо киирэ илик, оннун бэлэмниибит. Сокуон олоххо киирэр кэмигэр, биһиги эргиэни уонна тиэйиини хааччыйар бэлэм ханааллаах буолуохпут», — диэн Владимир Солодов кэпсээтэ.