Саха сирин сорох оройуоннарыгар COVID-19-нан ыалдьыбыт дьон ахсаана үрдээбитэ бэлиэтэннэ

Өрөспүүбүлүкэ хас да оройуонугар коронавируһунан ыалдьыбыт дьон ахсаана үрдээбитэ бэлиэтэннэ.

Бу туһунан өрөспүүбүлүкэтээҕи суһал штаб салайааччытын солбуйааччы Ольга Балабкина тохсунньу 18 күнүгэр быһа эпииргэ иһитиннэрдэ.

«Дьиэ кэргэнинэн саҥа дьыллааҕы бырааһынньыктарга түмсүү түмүгэр Миирнэйгэ, Алдаҥҥа, Нерюнгрига, Ленскэйгэ уонна Өлүөхүмэҕэ ыалдьыбыт киһи ахсаана элбээтэ», — диэтэ кини.

Ил Дархан Айсен Николаев оройуоннааҕы суһал штабтарга туһаайан балаһыанньаны хонтуруолга ыларга уонна ыарыыга сыстыы көрдөрүүтэ үрдээбэтин туһугар үлэ ыыталларыгар соруйда.