Саха сирин табаһыттара араадьыйа станциялары тутуохтара

2021 сыл тохсунньу-олунньу ыйдарыгар Саха сирин аҕыс улууһун таба иитэр хаһаайыстыбалара араадьыйа станциялары тутуохтара. Бу туһунан СӨ тыатын хаһаайыстыбатын министиэристибэтин пресс-сулууспата иһитиннэрэр.

50 устуука «Ангара-1М» араадьыйа станцията Алдан, Булуҥ, Дьааҥы, Муома, Нерюнгри, Томпо, Өймөкөөн уонна Усуйаана улуустарын тыйыс усулуобуйаҕа үлэлиир табаһыттарыгар тиһигэ быстыбат араадьыйа сибээһинэн хааччыйар сыаллаах бэриллиэҕэ.

Күн бүгүн үс араадьыйа станцията хайыы үйэ Саха сиригэр кэлбитэ этиллэр. Олор Томпо улууһун табаһыттарынан боруобалааһыны ааһыахтара. Атын прибордары тиксэрии 2021 сыл тохсунньу-олунньу ыйдарыгар күүтүллэр.

«Ангара-1» араадьыйа станциятын уратытынан 600 килэмиэтир ырааҕы хабар эрэллээх телефон-телеграфнай сибээстээҕэ буолар. Хаһаайыстыба иһинээҕи сибээстэһии олохтоммут болдьоҕунан араас долгуҥҥа оҥоһуллуоҕа. Тиксэриини Свердловскай уобалас «Егоршинскай радиозавод» ХЭУо оҥорор.