«Саха сирин талааннара» куонкуруска 5 тыһ. тахса кыттааччы бэлиэтэннэ

Өрөспүүбүлүкэтээҕи «Саха сирин талааннара» куонкуруска 5 тыһ. тахса киһи кыттыаҕа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

«Кадровай куонкурус сайдан иһэриттэн биһиги олус үөрэбит. Сыллата кыттааччы ахсаана элбээн иһэр. Ол аата кэскиллээх, актыыбынай дьон кэлэр олохторун биһиги өрөспүүбүлүкэбитин кытта ситимнииллэр. Кинилэр Саха сирэ сайдарын туһугар бэйэлэрин кылааттарын киллэриэхтэрин уонна кыахтарын манна арыйыахтарын баҕараллар», — диэн социальнай коммуникациялар уонна ыччат дьыалатын миниистирэ Степан Саргыдаев бэлиэтээтэ.

Куонкуруска кыттарга 5 017 киһи көҥүл ылыаҕа. Улуустартан сайаапка киириитэ 12 %-нан үрдээтэ.

«Кыттааччылар куонкурус түһүмэхтэрин санатар суруктары тутуохтара; сорудахтары ааһарга көмөлөһөр маастар кылаастар ыытыллыахтара. Бырайыакка кыттыы дистанционнай да көрүҥүннэн буоллар, элбэх умнуллубат, чаҕылхай түгэннэринэн туоллун диэн, кыттааччылар санааларын көтөҕөр бэлэхтэри оҥордубут», — диэн «Инновационнай менеджмент үрдүкү оскуолатын» ректора Ольга Сукуева.

Куонкурус үс түһүмэҕинэн ыытыллыаҕа: сүүмэрдээһин, сыаналыыр сессия, «LAB.TALENT» компетенция бырагырааматынан аҕыс ый устата үөрэнии. Түмүктүүр түһүмэххэ кыттааччылар уоннуу киһилээх хамаанданан бырайыак толкуйдаан олоххо киллэриэхтээхтэр. Ситиһиилээх хамаанда кыайыылаах буолуоҕа. Кинилэр араас таһымнаах бастыҥ үрдүк үөрэх кыһаларыгар үөрэнэр граннары ылыахтара, маны таһынан өрөспүүбүлүкэ кадровай резервэтигэр мэктиэлэниэхтэрэ.