«Саха сирин талааннара» куонкуруска кыттарга 2000 сайаапка киирдэ

«Саха сирин талааннара» каадырдар куонкурустарыгар кыттарга икки тыһыынчаттан тахса сайаапка киирдэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Бырайыак кыттыылаахтара компетенцияларын уонна тус хаачыстыбаларын сыаналааһынтан саҕалаан сайдыыга үөрэтиигэ тиийэ, биэс түһүмэҕи ааһыахтара. Куонкурус уларыйыыларга уонна саҥа бырайыактары олоххо киллэриигэ бэлэм хамаандалары тэрийэр сыаллаах. Түһүмэхтэр бары дистанционнай быһыылаах ыытыллыахтара. Сайаапкалары тутуу алтынньы 26 күнүгэр түмүктэнэр.

Куонкурус «Миниистир» өрөспүүбүлүкэтээҕи дьыалабыай оонньуу баазатыгар тэрилиннэ. 2019 сылтан саҕалаан бырайыак экспертэрэ кытааччылар лидерскэй уонна интеллектуальнай кыахтарын арыйыыга үлэлэһэллэр.

«Миниистир–2019» дьыалабыай оонньуу көмөтүнэн, бэйэбэр ордук табыгастаах зонаттан тахсарым элбээтэ. Каадырдар куонкуруста кытааччыларга бэйэлэрин кыахтарын холонон көрөр, регион кыһалҕалаах хайысхаларын билэр уонна ону быһаарыыга туһаайыллар бырайыактары толуйар кыах биэрэр. Билиҥҥи эдэр ыччат тугу эрэ оҥорон саҕалыырга сөптөөх түгэни мүччү туппат», – диэн ХИФУ устудьуона, Ил Түмэн ыччат парламенын чилиэнэ Михаил Донской кэпсээтэ.

«Саха сирин талааннара» бырайыак 300 финалиһа «LAB.TALENT» компетенциялары сайыннарыы бырагырааматыгар үөрэниэхтэрэ. Уон кыайыылаах Россия уонна аан дойду бастыҥ үөрэх кыһаларыгар үөрэнэргэ гран ылыахтара, ону тэҥэ Саха сирин салайар каадырдарын саппааһыгар киириэхтэрэ.