Саха сирин тас сибээстэрин концепциятын саҥа редакцията бигэргэннэ

СӨ тас сибээскэ уонна норуоттар дьыалаларыгар министиэристибэтэ Саха сирин тас сибээстэрин концепциятын саҥа редакциятын бигэргэттэ. Бу туһунан миниистир Гаврил Кириллин социальнай ситимнэргэ быһа эфир кэмигэр иһитиннэрдэ.

«Быйыл биһиги Саха сирин тас сибээстэрин концепциятын саҥа редакциятын оҥорон бигэргэттибит. Урукку концепция 2000 сыллаахха бигэргэммитэ. Онтон ыла 20 сыл ааста уонна эйэ уларыйда. Биһиги өрөспүүбүлүкэ тас сибээстэрин саҥа сүрүн хайысхалары саҥардардыахпытын уонна быһаарыахпытын наада этэ», — диэн кини эттэ.

Сүрүн хайысхалартан биирдэстэринэн Арктика балаһатыгар атын дойдулары уонна аан дойдутааҕы тэриллиилэри, олор истэригэр ООН-у уонна ЮНЕСКО-ны кытта бииргэ үлэлээһии буолар. Ону таһынан Азия-Чуумпу океан дойдуларын бииргэ үлэлээһин буолар.

«2020 сылга биһиги син элбэх норуоттар икки ардыларынааҕы улахан тэрээһиннэри тэрийдибит. Балаҕан ыйыгар туруктаах сайдыы хотугу форума иккис төгүлүн ааста. Пандемиянан сибээстээн онлайн-эрэһииминэн ыытылынна, ол көмөтүнэн 36 дойдуттан 2,5 тыһыынча киһи кыттыыны ылла», — диэн миниистир бэлиэтээтэ.

Министиэристибэ 2021 сыллааҕы былааныгар тас сибээс концепциятын олоххо киллэрии былаанын оҥоруу уонна бастакы кыбаарталга бигэргэтии баар. Ону таһынан, туруктаах сайдыы хотугу форумун уонна Евразия олохтоох былаастарын ахсыс конгреһын ыытыы.

«Ону тэҥэ Россия кэккэ регионнарын кытта бииргэ үлэлэһии туһунан сөбүлэһии баттаһар былааннаахпыт. Олор истэригэр Бурятия, Забайкальскай кыраай, Ленинград уобалаһа, Ханты-Мансийский автономный уокурук», — диэн Гаврил Кириллин эттэ.