«Саха сирин тимир суоллара» таһаҕаһы тиэрдиитэ 33 % үрдээбит

«Саха сирин тимир суоллара» АУо 2019 сыл тохсунньу — балаҕан ыйдарыгар таһаҕаһы тиэрдиитин кээмэйэ ааспыт сыл көрдөрүүтүттэн 33 %-нан үрдээбит. Бу туһунан «Интерфакс» иһитиннэрдэ.

Хампаанньа 2019 сыл тоҕус ыйын устата 5,37 мөлүйүөн туонна таһаҕаһы тиэрдибит. «Таһаҕас эргиирин уопсай көрдөрүүтэ 802,3 мөлүйүөн тонна-килэмиэтиргэ тэҥнэспит, 2018 сыл көрдөрүүтүттэн 25 %-нан үрдүк», — диэн хампаанньа пресс-сулууспата иһитиннэрэр.

Таһаҕас тиэйиитин 2018 сыл үһүс кыбаарталын түмүк көрдөрүүтүн кытары тэҥнээтэххэ, бары хайысха бөлөххө үрдээһин бэлиэтэнэр. Ол курдук таас чох тиэйиитэ — 45%, ньиэп бородууксуйата — 22% , ас-үөл таһаҕаһа — 34%, кэнтиэйнэрдээх таһаҕастар — 5%, уонна да атын табаар — 6% үрдээбит.