Саха сирин тоҕус куората — кыра куораттары тупсарыы куонкуруһугар кыттыахтара

Табыгастаах куорат эйгэтин хаачыстыбатынан саамай намыһах көрдөрүүлээх Саха сирин тоҕус куората, бүтүн Россиятааҕы кыра куораттары тупсарыы куонкуруһугар кыттыахтара. Бу туһунан өрөспүүбүлүкэтээҕи архитектура уонна куорат тутуутун управлениетын пресс-сулууспата иһитиннэрэр.

Испииһэккэ Алдан, Нерюнгри, Томмот, Ленскэй, Бүлүү, Орто Халыма, Удачнай, Миирнэй уонна Өлүөхүмэ киирдилэр.

Куорат эйгэтин хаачыстыбатын сыаналааһыҥҥа статистика дааннайдара эрэ буолбакка, атын дааннайдар эмиэ киирдилэр: куорат ыырын, геоинформационнай систиэмэлэрин, дистанционнай зоналарын ырытыы уо. д. а.

«Өрөспүүбүлүкэ куораттара федеральнай куонкурустарга кыттыылара — эбии үбү тардар кыаҕы биэрэр», — диэн өрөспүүбүлүкэ сүрүннүүр архитектора Ирина Алексеева эттэ.

2020 сылга Саха сиригэр кыра куораттары тупсарыы федеральнай бырагыраама чэрчитинэн 54 эбийиэккэ үлэ ыытыллар: 46 тиэргэн уонна аҕыс уопсастыбаннай сир. Бу сылга уопсайа 347 мөлүйүөнтэн тахса солкуобай көрүлүбүтэ: 276 мөлүйүөн солкуобай — федеральнай хааһынаттан, 24 мөлүйүөн солкуобай – өрөспүүбүлүкэ бүддьүөтүттэн уонна 46 мөлүйүөн солкуобай – олохтоох бэйэни салайыныылар бүддьүөттэриттэн.

Маны тэҥэ, Покровскайга, Ньурбаҕа уонна Дьааҥыга «Кыра куораттар уонна историяҕа киирбит бөһүөлэктэр» бүтүн Россиятааҕы куонкуруска кыайбыт бырайыактар олоххо киллэриллэллэр.