Саха сирин оҕолоро Монголияҕа тустан 16 мэтээли сүүйдүлэр

Улан-Баторга ыытыллыбыт көҥүл тустууга норуоттар икки ардыларынааҕы күрэххэ Саха сирин ыччатын сүүмэрдэммит хамаандата 16 мэтээли сүүйдэ, ол иһигэр алта кыһыл көмүһү. Бу туһунан «Спорт Якутии» иһитиннэрэр.

Саха сирин чиэһин өрөспүүбүлүкэ ыччатын сүүмэрдэммит хамаандатын сүрүн састаабын 15 бөҕөһө уонна Уус Алдан улууһун Бороҕон сэлиэнньэтин олимпийскай эрэллэри бэлэмниир спортивнай оскуолатын сэттэ үөрэнээччилэрэ көмүскээтилэр.

Күрэхтэһиигэ Бурятия, Тыва, Кытай уонна Монголия бөҕөстөрө кытыннылар.

«Хас биирдии ыйааһыҥҥа биһиги оҕолорбут элбэх биир саастыылаахтарын кытары киирсэн 16 мэтээли, ол иһигэр алта кыһыл көмүс мэтээли ылары ситистилэр», – диэн Саха сирин сүүмэрдэммит хамаандатын тренерэ Владислав Петров кэпсээтэ.

Уопсай түмү,ккэ Саха сирэ Монголия сүүмэрдэммит хамаандатыгар баһыйтаран иккис миэстэҕэ таҕыста.

«Алтынньы 25-27 күннэригэр спорт үтүөлээх маастара Олимпийскай оонньуулар үс төгүллээх чөмпүйүөннэрэ Бувайсар Сайтиев аатынан XV норуоттар икки ардыларынааҕы турнирга кыттыахтаахпыт», – диэн Владислав Петров эбэн эттэ.