Саха сирин тыатын хаһаайыстыбатын үлэһиттэрэ #МыДляВасБезВыходных аахсыйаҕа кыттыһаллар

Дойду үрдүнэн биллэриллибит өрөбүл нэдиэлэлэрин уонна изоляция эрэһиимин кэмигэр өрөспүүбүлүкэ тыатын хаһаайыстыбатын үлэһиттэрэ олохтоохтору сибиэһэй этэ, үүтэ уонна оҕуруот аһа суох хаалларыахтара суоҕа. Бу туһунан СӨ тыа хаһаайыстыбатын министиэристибэтин пресс-сулууспата иһитннэрэр.

Фермаларга, көтөр фабрикаларыгар, килиэп бэкээрнэлэригэр, үүт, эт бородуукталарын оҥорон таһаарар тэрилтэлэргэ үлэлиир тыа хаһаайыстыбатын салаатын туруу үлэһит дьоно #МыДляВасБезВыходных бүтүн Россиятааҕы аахсыйаҕа кыттыстылар.

Аахсыйа кыттыылаахтар эпидемиологическэй балаһыанньанан олохтоммут уустук усулуобуйаҕа Саха сирин олохтоохторо бородууктанан хааччыллыылаах буолалларыгар бары сыраларын ууран өрөбүлэ суох үлэлииллэр.

«Дьиэҕитигэр олоруҥ — ас-үөл барыбытыгар тиийэ», — диэн аахсыйа кыттыылаахтара ыҥыраллар.

Флешмобка Дьокуускайдааҕы көтөр фабрикатын уонна килиэп кэмбинээтин, Хатастааҕы сибинньэ иитэр комплексын, «Туймаада» экоферма, Чурапчы улууһун «Чурапча», Нам улууһун «Эрэл» уонна да атын хампааньалар үлэһиттэрэ кыттыыны ыллылар.