Саха сирин учууталларын түөрт хамаандата «Кэлэр кэм учуутала» куонкурус полуфиналыгар киирдилэр

Саха сирин учууталларын түөрт хамаандата «Кэлэр кэм учуутала» бүтүн Россиятааҕы учууталлар идэлээх куонкурустарын полуфиналыгар таҕыстылар. Бу туһунан СӨ үөрэҕириигэ уонна наукаҕа министиэристибэтин пресс-сулууспата иһитиннэрэр.

Полуфиналга Орто Халыма орто оскуолатын, И.Л.Кондаков аатынан Бүлүү гимназиятын, Сааскылаах орто оскуолатын уонна Л.А.Попугаева аатынан Мииринэй оройуонун 19-с №-дээх оскуолатын хамаандалара киирдилэр.

Куонкуруска Уһук Илиҥҥи уокурук үрдүнэн уопсайа 1496 учуутал, Саха сириттэн — 275 учуутал сайаапка биэрбитэ бэлиэтэнэр. Кэлэр түһүмэх олунньу 21-23 күннэригэр Владивосток куоракка ыытыллыаҕа.

«Күрэх балаһыанньатынан учууталлар оскуола олоҕор чахчы үөскүүр быһыыны-майгыны ырытыахтара, дьиссипилиинэлэр икки ардыларынааҕы уруоктары, оонньуулары бэлэмниэхтэрэ уонна бэрэбиэркэлиир үлэлэри толоруохтара», — диэн этиллэр.

Куонкурус 2019 сыл сэтинньи ыйыгар «Россия — кыах дойдута» түмсүү көҕүлээһининэн саҕаламмыта уонна учууталлар хамаанданан үлэлиир маҥнайгы федеральнай таһымнаах бырайыактарынан буолара бэлиэтэнэр.