Саха сирин улуустарыгар 2000 тонна кэриҥэ от умайда

Өрөспүүбүлүкэҕэ икки тыһыынча тонна кэриҥэ кэбиһиллибит от умайда. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Өрөспүүбүлүкэ бырабыыталыстыбатын бэрэссэдээтэлин бастакы солбуйааччы Алексей Колодезников иһитиннэрэринэн, бүгүн Саха сиригэр 14 ойуур баһаара баар, ол иһигэр 12 баһаар хонтуруолланар, икки баһаар умуруоруллар.

«Уус Алдаҥҥа уонна Чурапчыга турбут баһаар бүгүн, эбэтэр сарсын умуруоруллуоҕа уонна тыа пуондатыгар баһаарга кутталлаах сезон түмүктэниэҕэ», — диэтэ.

Ордук ыарахан балаһыанньа Амма улууһугар бэлиэтэнэрин, ыксаллаах быһыы-майгы биллэриллибитин уонна маннык балаһыанньа Таатта улууһугар баарын ыйда.

Элбэх баһаар тыа хаһаайыстыбатын сирдэригэр барарынан, Экология министиэристибэтигэр уонна СӨ Тыа хаһаайыстыбатын министиэристибэтигэр баһаар барар түрүөтүн быһаарарга дьаһал бэрилиннэ.

«Улуустарга оту өртөөһүн хонтуруолламмат. Атырдьах ыйын бүтүүтүттэн балаҕан ыйыгар диэри этиҥ бэлиэтэммэтэҕэ. Баһаардар дьон уотунан сэрэҕэ суох туттуутуттан үөскүүллэр», — диэтэ Алексей Колодезников.

Маны таһынан, Ис дьыала министиэристибэтигэр уонна РФ Ыксаллаах быһыы-майгы министиэристибэтин өрөспүүбүлүкэтээҕи салаатыгар үөскээбит баһаардар биричиинэлэрин быһаарарга эппиэтинэстээх дьону аныырга дьаһал бэрилиннэ. Бэрэссэдээтэл собуйааччыта этэринэн, бүгүҥҥү туругунан, буруйдаахтарга 197 административнай дьыала уонна үс холуобунай дьыала тэрилиннэ.

Тыа хаһайыстыбатын министиэристибэтин суһал иһитиннэриитинэн, Саха сиригэр баһаартан 1900 туонна бэлэмнэммит от умайда. Билиҥҥи туругунан, нэһилиэнньэ олохтоохторун хоромньуларын төлүүр источник көрдөнөр.

Дьаһалта баһылыгын э.т. Татьяна Осипова иһитиннэрэринэн, бүддьүөттэн 7,6 мөлүйүөн солкуобайы от компенсациятыгар ыытарга сайаапка бэрилиннэ. Хоромньу хамсааһыныттан суума уларыйыан сөп.