Саха сирин улуустарыгар 48 тыһыынча тонна кэриҥэ оту тиэйиэхтэрэ

Сүөһү кыһыҥҥы кыстыгын хааччыйыыга Горнай, Бүлүү уонна Кэбээйи улуустарыгар 48 тыһыынча тонна оту тиэйиэхтэрэ.

Бүгүҥҥү күн туругунан өрөспүүбүлүкэ үрдүнэн уопсайа 185 тыһыынча төбө сүөһү уонна 186 тыһыынча төбө сылгы ааҕыллар. Бэйэ бас билиитигэр баар уонна тэриллиилээх хаһаайыстыбаларга быйылгы кыстыкка 350 тыһыынча тонна оту бэлэмнээбиттэрэ, бу ирдэнэр от кээмэйин 74 %-гар тэҥнэһэрэ бэлиэтэнэр. Онуоха 11 тыһыынча сылгы хайыы үйэ эбии аһылыкка сылдьар.

Ордук уустук быһыы-майгы Горнай, Бүлүү уонна Кэбээйи улуустарыгар бэлиэтэнэр, бу улуустарга эбии от тиэйиитэ ыытыллыаҕа. Ураты болҕомто сүөһү дороххой аһылыгын тириэрдиигэ ууруллуоҕа.