Саха сирин улуустарыгар уматык тиэйиитин былаана 100% кэриҥэ туолла

Өрөспүүбүлүкэ улуустарыгар уопсайа 509 тыһыынча тонна уматык тиэйилиннэ. Бу туһунан өрөспүүбүлүкэтээҕи олорор дьиэ уонна коммунальнай хаһаайыстыба пресс-сулууспата иһитиннэрэр.

«Кулун тутар 23 күнүн туругунан уопсайа 509 тыһыынча тонна уматык саппааһа тиэрдилиннэ, тиэйии былаана 90 %-на туолла», — диэн этиллэр.

Кыһыҥҥы суолунан уматыгы тиэйии былаана 563 тыһыынча тоннаҕа тэҥнэһэрэ бэлиэтэнэр. Муус устарга диэри өрөспүүбүлүкэ улуустарыгар 507 тыһыынча тонна чох, 25 тыһыынча тонна гаас уонна 31 тыһыынча тонна ньиэп бородууксуйатын оттуга тириэрдиллиэхтээх.

Инники этиллибитинэн, «Куттала суох уонна хаачыстыбалаах айан суоллара» национальнай бырайыак чэрчитинэн Саха сиригэр суоллары чөлүгэр түһэриигэ 4,2 миллиард солкуобай көрүллүбүтэ. Бу национальнай бырайыак дойду бэрэсидьиэнэ Владимир Путин 2018 сыллааҕы туһаайыытынан олохтоммута.