Саха сирин выпускниктара БКЭ туттаран саҕалаатылар

Бүгүн, от ыйын 3 күнүттэн, Саха сиригэр биир кэлим эксээмэни туттаран саҕалаатылар. Өрөспүүбүлүкэ үрдүнэн уопсайа 7968 выпускник баара бэлиэтэнэр, олортон 5991 выпускник эксээмэн туттарар диэн СӨ үөрэххэ уонна наукаҕа министиэристибэтин пресс-сулууспата иһитиннэрэр. «Убаастанар биричиинэнэн эксээмэн туттара кэлбэтэх дьоҥҥо, атырдьах ыйыгар эбии күн көрүллэр. Оттон мөлтөхтүк туттарар түгэннэригэр бу сылга хос туттарыы көрүллүбэт», — диэн министиэристибэ биллэрдэ. Дьаҥ турбутунан сибээстээн эксээмэни туттарыы Роспотребнадзор кытаанах ирдэбилинэн барар. Ол курдук Аллайыаха улууһугар харыстанар мааскалар уонна бэрчээккэлэр, антисептиктэр, салгыны ыраастыыр рециркулятордар турдулар. «БКЭ-ни куттала суох усулуобуйаланы оҥорууга элбэх үлэ оҥоһуллунна. Биһиэхэ эскээмэни туттарар биир пуун толору тэриллэн турар, ону тэҥэ икки аудитория Чокурдаах орто оскуолатын баазатыгар эмиэ бэлэм. Быйыл эксээмэни тоҕус выпускник туттарар», — диэн улуус үөрэххэ салайааччыта Рустам Шагабеев биллэрдэ. Быйыл регион үрдүнэн уопсайа 200 эксээмэн туттарар пуун үлэлиир.