Саха сирин ыраах сытар улуустарыгар саҥа аэропортары тутуохтара

Өрөспүүбүлүкэ салалтата Саха сирин ыраах сытар улуустарын 10 аэропордун федеральнай целевой бырагыраамаҕа киллэрэри былаанныыр. Бу туһунан ТАСС иһитиннэрэр.

Россия бэрэсидьиэнэ Владимир Путин табыгастаах сырыыны үрдэтэр туһунан туһаайыытын чэрчитинэн 2035 сылга диэри Уһук Илини сайыннарыы национальнай бырайыакка өрөспүүбүлүкэ 10 аэропордун тупсаран оҥоруу (Ленскэй, Сунтаар, Алдан, Муома, Уус Куйга, Сааскылаах, Уус Майа, Баатаҕай, Өлөөн, Зырянка) киириэҕэ. Тупсаран оҥоруу уопсай суумата 29,8 миллиард кэриҥэ солкуобайга тэҥнэһэр.

Өрөспүүбүлүкэ бырабыыталыстыбатын бэрэссэдээтэлэ Владимир Солодов иһитиннэрбитинэн, 2024 сылга диэри сырыыга табыгастаах эйгэни тэрийии былаанынан Саха сиригэр уопсайа 26 хотугу аэропорду тупсаран оҥоруу ирдэнэр.

«Ол да буоллар Ленскэй, Сунтаар, Алдан, Муома, Уус Куйга, Сааскылаах, Уус Майа, Баатаҕай, Өлөөн уонна Зырянка — бу 10 аэропорд бу чөлүгэр түһэрии былааныгар киирбэтилэр. Салгыы федеральнай целевой бырагыраамаҕа киллэрэр иһин үлэлиибит. Аэропортары тупсаран оҥоруу сүһүөхтэринэн ыытыллыаҕа», — диэн эттэ

Этиллибит комплекснай былааҥҥа 2024 сылга диэри Саха сирин 16 аэропордун чөлүгэр түһэрии бырайыактара киирдилэр: Дьокуускай, Өлүөхүмэ, Ньурба, Мииринэй, Черскай, Эдьигээн, Хаандыга, Үрүҥ Хайа, Үөһээ Бүлүү, Бүлүү, Депутатскай, Сангар, Нерюнгри, Полярнай, Уус Ньара уонна Маҕан. Бу үлэлэри ыытыы уопсай суумата 38,6 миллиард солкуобайга тэҥнэһэр.