Саха сиринээҕи Үөрэх уонна наука министиэристибэтэ «Тыа сирин учуутала» бырагырааманан үлэ миэстэтин чопчулуоҕа

СӨ Үөрэх уонна наука министиэристибэтэ 2019 сыл ахсынньы 25 күнүгэр диэри «Тыа сирин учуутала» бырагырааманан үлэ миэстэтин чопчулуоҕа.

Чопчулааһыҥҥа өрөспүүбүлүкэ нэһилиэнньэлээх пууннарын демографическай уонна социально-экэнэмиичэскэй инникитин учуоттуохтара. «Тыа сирин учуутала» бырагыраама кыттыылаахтара куонкуруһунан сүүмэрдэниэхтэрэ.

Куонкурус хамыыһыйатыгар уопсастыбаннай тэриллиилэр бэрэстэбиитэллэрэ, өрөспүүбүлүкэ Үөрэҕин уонна наукатын министиэристибэтин исписэлиистэрэ, куоластыырга бырааба суох эрэгийиэннээҕи оператор бэрэстэбиитэллэрэ киириэхтэрэ.

Бырагыраамаҕа хапсар туһуттан учуутал категориятын, учуонай истиэпэнин, ыстааһын, биир тэрилтэҕэ өр түптээн үлэлээбитин көрүөхтэрэ.

СӨ Үөрэҕин уонна наукатын миниистирэ Владимир Егоров бырагыраамаҕа 55-гэр диэри саастаах тустаах үөрэхтээх учууталлар кытталларын бэлиэтиир. «Учуутал тыа оскуолатыгар көһөргө, дуогабар баттаммыт күнүттэн онно биэс сыл үлэлииргэ бэлэм буолуохтаах. Өрөспүүбүлүкэҕэ барыллаан 50 квота көрүлүннэ», — диир миниистир.

«Тыа сирин учуутала» бырагыраама 2020-2022 сылларга үлэлиэҕэ.

Санатан эттэххэ, «Тыа сирин учуутала» бырагыраама Уһук Илиҥҥэ кыттааччыларыгар иккилии мөлүйүөнү ылыахтара.