Саха сириттэн биэс боксер Олимпиадаҕа тиийэр туһугар киирсиэҕэ

Саха сириттэн биэс боксер Россия боксаҕа чемпионатыгар кыттыаҕа. Күөн күрэс түмүгүнэн Токиоҕа Олимпиадаҕа кыттааччылары сүүмэрдиэхтэрэ. Чемпионат Оренбург куоракка сэтинньи 28 күнүттэн ахсынньы 5 күнүгэр диэри буолуоҕа. «Бокса федерациятын рейтининэн Саха сирин боксердара бастыҥнарга киирсэллэр. Ону кытта Рязань, Красноярскай уонна Крым спортсменнара», — диэн иһитиннэриигэ этиллэр.

Күөн күрэскэ дойду бары регионнарыттан 300-тэн тахса боксер кыттыаҕа. Кинилэр Олимпискай оонньууларга талар турнирга хомуур хамаандаҕа киирсэр туһугар кыһаллыахтара. Санатан эттэххэ, Олимпиаданы 2021 сылга көһөрбүттэрэ. Чемпионат бириистээх пуондата 10 мөлүйүөн солкуобай.