Саха сириттэн сылдьар звукорежиссер ArtMasters чемпионат финалыгар таҕыста

Саха сириттэн сылдьар Ренат Максутов «ArtMasters» айар-тутар эйгэ бастакы аһаҕас национальнай чемпионатын финалиһынан буолла. Бу туһунан Юрий Гагарин аатынан култуура уонна аныгы искуустуба киинин пресс-сулууспата иһитиннэрэр.

Бырайыак эдэр талааннаах дьону арыйар уонна өйүүр сыаллаах ыытыллар. Чөмпүйэнээт түмүгүнэн сүрүн бырагыраама кыайыылаахтара быһаарыллыахтара. 16 хайысхаттан хас биирдиитигэр үс бастакы бириистээх миэстэ уонна көрөөччү биһирэбилин бириис хаһаайына ааттаныаҕа.

Кыайыылаах 500 тыһыынча солкуобай суумалаах сертификатынан наҕараадаланыаҕа. Сертификаты үөрэниигэ, профессиональнай оборудованиены ылыыга, эбэтэр бэйэ бырайыагын олоххо киллэриигэ туһаныахха сөп.

Алтынньы 20 күнүгэр 5.59 чааска диэри чемпионат сайтыгар куоластааһын ыытыллар. Саха сириттэн сылдьар Ренат Максутов «Звукорежиссер» хайысхаҕа кыттыыны ылар.