Саха сириттэн уон учуутал федеральнай бириэмийэ ылыаҕа

РФ Үөрэҕириитин министиэристибэтэ педагогическай үлэҕэ ситиһии иһин бириэмийэ аныыр куонкуруһун түмүгүн таһаарда. Дойду бастыҥ учууталларын ахсааныгар өрөспүүбүлүкэ 10 учуутала киирдэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Бастыҥ учууталлар испииһэктэригэр Дьокуускай биэс учуутала, Бүлүү, Мэҥэ Хаҥалас, Уус Алдан, Хаҥалас улуустарыттан уонна Нерюнгри оройуонуттан биирдии учуутал киирдэ.

Куонкуруска кыттарга учууталга үөрэтэр бирэдимиэтинэн үчүгэй сыанабыллаах уонна түмүктээх тус бэйэ методическай оҥоруута, үөрэнээччи бирэдимиэккэ уонна үөрэх таһынааҕы дьарыкка үрдүк ситиһиитэ баар буолара ирдэнэр.

«Учуутал араас үөрэтэр ньымалары туһаныахтаах, ол иһигэр дистанционнай үөрэхтээһин ньымаларын. Маны таһынан уһулуччу талааннаах оҕолору, социальнай кыһалҕалаах дьиэ кэргэттэр оҕолорун, эбэтэр ыарахан балаһыанньалаах олохтоох оҕолору үөрэтиигэ усулуобуйаны тэрийиэхтээх», — диэн өрөспүүбүлүкэ Үөрэҕин министиэристибэтигэр кэпсээтилэр.

Кыттааччылар үөрэх тэрилтэтин салайар коллегиальнай уорганнар уонна профессиональнай түмсүүлэр ааттарыттан турдулар. Сыаналыыр экспертэргэ үөрэх салаатын судаарыстыбаннай салалтатын уорганнарын бэрэстэбиитэллэрэ, уопсастыбаннайтүмсүүлэр уонна төрөппүттэр сүбэлэрэ киирдилэр.

Куонкурус икки түһүмэҕинэн ыытылынна. Куонкурус улуустааҕы түһүмэҕэр өрөспүүбүлүкэ 83 үөрэҕин тэрилтэлэриттэн 97 учуутал кытынна. Өрөспүүбүлүкэ түһүмэҕэр 55 учуутал ааста. Кыайыылаах учууталлар алтынньы 5 күнүгэр диэри 200 тыһыынча солкуобай суумалаах бириэмийэ ылыахтара.