Саха спортсменнара Ильмень күөл тула сүүрүөхтэрэ

Атырдьах ыйын 6 күнүгэр Саха сирин алта спортсмена Новгородскай уобаласка Ильмень күөл тула 250 килэмиэтири сүүрүөхтэрэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Сүүрэр бөлөҕү Саха сирин физическэй култууратын уонна спордун үтүөлээх үлэһитэ, «Азия оҕолоро» уонна «Манчаары» оонньууларын эстафеталарын салайааччыта уонна кыттыылааҕа, спорт бэтэрээнэ Дмитрий Горохов баһылыаҕа.

«Ил Дархан Айсен Николаев быйылгы Улуу Кыайыы 75 сылын Саха сиригэр дойдуга бэриниилээх буолуу сылынан биллэрбитэ. Биһиги оҕолорго буолан ааспыт кыргыһыылар уонна хорсун быһыылар тустарынан кэпсиибит. Пааматынньыктары, обелисктары туруоруу уонна сөргүтүү үлэтин ыытабыт. Пандемиянан сибээстээн сүүрүүбүтүн ыам ыйыгар сатаан ыыппатахпыт, ол да буоллар билигин Новгородскай уобаласка тиийэн саха хорсун салааттара сылдьыбыт сирдэринэн сүүрэр кыахтанныбыт», – диэн Дмитрий Горохов кэпсээтэ.

Тэрээһин 1943 сыл олунньу 23 күнүгэр Ильмен күөлгэ буолбут кыргыһыы кэриэһигэр ыытыллар. Онно 300 саха байыаһа олохторун олук уурбуттара.