Саха тустууктара Улан-Удэҕа норуоттар икки ардыларынааҕы турнирга кыттыахтара

Ахсынньы 2-3 күннэригэр 12 саха бөҕөһө Улан-Уде куоракка, 23-гэр диэри саастаах юниордар истэригэр ыытыллар, II норуоттар икки ардыларынааҕы көҥүл тустуу турнирыгар кыттыыны ылыа. Бу туһунан «Спорт Якутии» иһитиннэрэр.

«Быйылгы күрэххэ 12 саха бөҕөһө кыһыл көмүс мэтээл иһин киирсиэ. Билигин спортсменнар өрөспүүбүлүкэ юниордарын сүүмэрдэммит хамаандатын тренера Станислав Захаровы кытта бэлэмнэнии түмсүүтүгэр сылдьаллар», – диэн этиллэр.

Олор истэригэр аан дойду уонна Европа бастыыр иһин күрэҕин кыайыылааҕа Алексей Копылов уонна аан дойду көбүөрүн бирииһин кыайыылааҕа Петр Константинов бааллар.

Мэтээллэри уон араас ыйааһыҥа оонньотуохтара.

Маҥнайгы турнирга Бурятия, Монголия, Саха сирэ, Тыва, Забайкальскай кыраай, Красноярскай кыраай, Кемеровскай уобалас, Хабаровскай кыраай, Иркутскай уобалас 170 тустууга кыттыыны ылбыта.