Саха сирин урбаанньыттарыгар түөкүттэр борокуратуура үлэһитинэн ааттанан эрийэллэр

Дьокуускайга төлөпүөн нөҥүө түөкүннээһин түбэлтэлэрэ элбээтилэр. Бу туһунан Россия ис дьыалаларга министиэристибэтин өрөспүүбүлүкэтээҕи салаатын пресс-сулууспата иһитиннэрэр.

«Быраабы араҥаччылыыр уорганнарга хас да урбаанньыт биллибэт киһи суотабай төлөпүөнүнэн эрийэн, борокуратуура үлэһитинэн ааттанан «Москва бэрэбиэркэтинэн» куттаабытын туһунан тыллаата», — диэн этиллэр.

Онуоха эрийбит киһи бу бэрэбиэркэҕэ бэлэмнэнэргэ көмөлөһөргө этии киллэрбит.

Борокуратуура үлэһиттэрэ ханнык эмэ бэрэбиэркэҕэ бэлэмнэниигэ көмөнү оҥорботторун полиция санатар.

Маннык түбэлтэлэр тахсар түгэннэригэр, нэһилиэнньэни тута полицияҕа иһитиннэрэгитигэр ыҥыраллар.