«Сахачай» бородууксуйата Германияҕа ас-үөл быыстапка дьаарбаҥкатыгар көрдөрүлүннэ

«Сахачай» бородууксуйата Берлин куоракка «Күөх нэдиэлэ» норуоттар икки ардыларынааҕы ас-үөл быыстапка дьаарбаҥкатыгар көрдөрүлүннэ. Бу туһунан СӨ тыа-хаһаайыстыбатын пресс-сулууспата иһитиннэрэр.

Быыстапка ыалдьыттара саамай хотугу чэйи амсайдылар, ону тэҥэ бу чэй Саха сиригэр хайдах хомулларын уонна оҥоһулларын туһунан биллилэр.

«Биһиги 1926 сылтан ыытыллар тыа-хаһаайыстыбатын оҥорон таһаарааччыларын аан дойду үрдүнэн саамай улахан быыстапката баарын туһунан билбиппит. Тута онно хайаан да барар туһунан санаа киирбитэ. Саха сирэ «Күөх нэдиэлэ» быыстапкаҕа бүтэһигин 2009 сылга кыттыбыта. Биһиги онно СӨ экспорты өйөөһүн киинин көмөтүнэн тиийдибит», – диэн «Сахачай» хампаанньа салайааччыта Нюргуяна Заморщикова кэпсээтэ.

«Grüne Woche» – 85-с төгүлүн ыытыллар, биир саамай сүдү норуоттар икки ардыларынааҕы ас-үөл быыстапката буолар. Россия экспозицията Тыа хаһаайыстыбатын министиэристибэтин уонна Россия экспортка киинин көмөтүнэн тэрилиннэ.

Биэс тыһыынча кв миэтэрэ иэннээх былаһааккаҕа 18 регион уонна 250 хампаанньа аан дойдутааҕы хаачыстыба уонна экология ирдэбилигэр эппиэттиир бородууксуйалара көрдөрүлүннүлэр.