Сахалар икки бырайыактара 100 бастыҥ испииһэгэр киирдэ

2018 сыллаахха бэрэсэдьиэн гранын ылбыт бырайыактары олоххо киллэрии сыанабылын түмүгүнэн, сахалар икки бырайыактара ТОП-100 иһигэр киирдэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Бастыҥнар испииһэктэригэр «Саха сирин Национальнай художественнай түмэлин сайыннарыы пуондата» коммерческайа суох тэрилтэ оҥорбут «Пятая Международная якутская биеннале современного искусства BY-18» диэн бырайыага киирдэ.

Биеннале — диэн кыраныысса таһынааҕы уонна Россия биллэр худуоһунньуктарын хартыыналарын аныгы бырайыак-куонкуруһун улахан быыстапката. Биеннале Дьокуускайга хас чуотунай сыл аайы тэриллэр.

Иккиһинэн, «Женщины автолюбители Якутии» ассоциация тэрийбит «Булуҥ улууһун Таймылыыр нэһилиэгэр чөл олоҕу сөргүтүү» бырайыага испииһэккэ киирдэ.

Бырайыак Таймылыыр нэһилиэгин олохтоохторун доруобуйаларын чэбдигирдиигэ уонна моральнай-психологическай туруктарын тупсарыыга туһуланар. Соруга — арыгылааһыны, табахтааһыны профилактикалааһын, дьиэ кэргэн туругун тупсарыы уонна да атын социальнай кыһалҕалар.

Уопсайа 3 526 көҕүлээһин кытынна.