Сахалар көрбөт дьоҥҥо пауэрлифтинг аан дойдутааҕы чөмпүйэнээтигэр миэстэлэстилэр

Сэтинньи 15-22 күннэригэр Египетка көрбөт дьоҥҥо пауэрлифтинг аан дойдутааҕы чөмпүйэнээтигэр Людмила Пахомова уонна Игорь Созонов бириистээх миэстэлэргэ тигистилэр. Бу туһунан Саха өрөспүүбүлүкэтин сүүмэрдэммит хамаандатын тренера Петр Давыдов иһитиннэрдэ.

Саха кыыһа Людмила Пахомова штанганы сытан эрэн өрө анньыыга үрүҥ көмүс мэтээли ылары ситистэ. Бу кини аан дойду таһымнаах күрэхтэһиигэ маҥнайгы кыттыыта буолар диэн бэлиэтээтэ.

Игорь Созонов троеборье уонна штанганы сытан эрэн өрө анньыыга икки боруонса мэтээл хаһаайына буолла.

«Люда СГТХА устудьуонката, Игорь — Инбэлииттэри үөрэтэр уонна реабилитациялыыр өрөспүүбүлүкэтээҕи техникум-интернат адаптивнай физкультураҕа инструктора. Иккиэн Саха сирин сүүмэрдэммит хамаандаларын бэлэмниир кииниттэн сылдьаллар», – диэн Петр Давыдов кэпсээтэ.

Игорь Созонов аан дойду таһымнаах күрэхтэһиигэ үһүс төгүлүн күрэхтэһэр. 2018 сылга 60 киилэҕэ диэри ыйааһыннаахтарга аан дойду чөмпүйүөнэ буолбута. 2019 сылга 67,5 киилэ ыйааһыннаахтар бөлөхтөрүгэр кытынна.