Сахалыы сериаллар сайтара тахсыаҕа

НВК САХА – «Саха» көрдөрөр-иһитиннэрэр хампаанньа 2000 сыллар саҕаланыылара «Сэргэлээххэ», «Ыаллыылар» диэн сахалыы сериаллары устан, элбэх киһи сэҥээриитин ылбыттара. Бу сериалларга бүтүн көлүөнэ улааппыта, киэһэ аһылыкка  дьиэ кэргэн мустан олорон көрөллөрө, сиэрийэлэрин күүтэллэрэ.

Оттон аҕыйах сылтан бэттэх, «НВК Саха» ханаалга аныгы олоҕу кэрэһилиир саҥа сериаллар көстөллөр. Ол курдук, «Ааспыт ааспат амтана», «Сүлүһүннээх таптал» элбэх сиэрийэлээх киинэлэр таҕыстылар. Телевидение быйылгы сезонугар үс сериал тахсыахтаах. Ону кытта алтынньы ыйтан nvk-online.ru сайтка суруттарыынан «Сэргэлээххэ», «Ыаллыылар», «Ыллыктар», «Сүлүһүннээх таптал», «Ааспыт ааспат амтана» сериаллары көрүөххэ сөп.   

Сериаллар тустарынан бүгүҥҥү суруналыыстары кытта көрсүһүүгэ продюсер Марина Пермякова кэпсээтэ:

  • Сотору кэминэн «Сүлүһүннээх таптал» салгыыта тахсыаҕа. Билигин саҥа «Лиза уонна Иза» диэн эрдэҕэс саастаах оҕолорго, ыччакка аналлаах сериалы уста сылдьабыт. Режиссер – Марина Платонова. Манна олоххо баар түгэннэр көстөллөр. Ол курдук, төрүүр дьиэҕэ оҕолору атастаһыннаран кэбиһэллэр. 15 сыл ааспытын кэннэ кыргыттар көрсө түһэн, атастаһыннарбыттарын билэллэр. Кастинг биллэрбиппитигэр олус элбэх киһи кэлбитэ. Киинэҕэ 90% хаһан даҕаны көстүбэтэх артыыстар оонньууллар. Өссө биир саҥа «Күдээринэ күүрээн» диэн сериал Саҥа дьыл кэнниттэн тахсыахтаах. Манна билиҥҥи кэм, киһи майгыта-сигилитэ, икки дьиэ кэргэн олоҕо-дьаһаҕа көстөр.                         

Санатан эттэххэ, сериаллар 38-тыы мүнүүтэлээх 16 сиэрийэттэн тураллар. Бэнидиэнньиктэн чэппиэргэ диэри киэһэ аайы көстөллөр.