«САХАТЭК» хампаанньа Отраднинскай ньиэп-гаас баайдаах сиригэр дизель уматыгын оҥорон таһаарары былаанныыр

«САХАТЭК» хампаанньа Отраднинскай ньиэп-гаас баайдаах сиригэр дизель уматыгын оҥорон таһаарары былаанныырын туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Ил Дархан Айсен Николаев «САХАТЭК» АО дириэктэрдэрин Сэбиэтин бэрэссэдээтэлин Афанасий Максимовы кытта көрүстэ. Салайааччылар Саха сиригэр ньиэп-гаас салаата сайдыытын туһунан боппуруоһу ырыттылар.

«Ньиэп-гаас хостооһунун боппуруоһугар  улахан былааннаахпыт. Бүгүҥҥү туругунан Булуҥ улууһун Арктика кытылыгар ньиэп-гаас баайдаах сири көрдөөһүҥҥэ үс лицензия ыллыбыт. Бу бырайыагы 30 миллиард долларга сыаналыыбыт», — диэтэ Максимов. Хампаанньа уопсайа 54 лицензияны ылары былаанныыр.

Гаас конденсатын уонна гааһы оҥорон таһаарыыга GTL технологияны туттуу  боппуруоһа көрүллэр диэн бэлиэтээтэ. Бу салааҕа сүрүнэ — гаас синтеһин нөҥүө дизель уматыгын оҥорон таһаарыы.

Отраднинскай ньиэп-гаас баайдаах сиригэр дизель уматыгын оҥорон таһаарыыны боруобалаан саҕалыыры былаанныылларын туһунан Афанасий Максимов иһитиннэрдэ.

Гаастан дизель уматыгын оҥорон таһаарыы бырайыагын Айсен Николаев өйөөтө. «Бэйэ уматыгын оҥорон таһаарыы өрөспүүбүлүкэ экэниэмикэтэ сайдарыгар олук буолуоҕа», — диэтэ өрөспүүбүлүкэ баһылыга.