Сайсары уокуругар икки этээстээх дьиэ баһаарын умуруордулар

Киин куорат Сайсары уокуругар икки этээстээх дьиэ баһаарын умуруордулар. Бу туһунан РФ ыксаллаах быһыыга-майгыга министиэристибэтин Саха сиринээҕи салаатын пресс-сулууспата иһитиннэрэр.

Баһаарынайдар кэлэллэригэр икки этээстээх ыскылаат умайа турбут. Салгыы уот аттыгар турар үс этээстээх маҕааһыын кырыыһатыгар көспүт.

«Баһаарга аттыгар турар дьиэлэр былдьанар кутталлара баар этэ. Баһаарынайдар сөптөөх уонна түргэн дьайыыларын түмүгэр уоту умуруордулар», — диэтэ РФ баһаары утары сулууспатын Саха сиринээҕи салаатын бэһис этэрээтин дежурнай сменатын начальнига Николай Сабуров.

Уоттан уопсайа 200 квадратнай миэтэрэ иэннээх ыскылаат, маҕаһыын бүрүөһүнэ уонна кырыыһата эмсэҕэлээтэ.

Баһаарга олохтон туораабыт, эмсэҕэлээбит киһи суох. Умайыы тахсыбыт биричиинэтэ, буруйдаах быһаарыллар.

Баһаары умуруорууга тоҕус баһаарынай тиэхиньикэ туттулунна уонна 41 тус састаап кытынна.