Самара сэрэбиэйдьитэ Дьокуускай олохтоохторун 270 тыһ. солк. албыннаабыт

Дьокуускай икки олохтоох дьахтара Самара олохтооҕун счетугар сэрэбиэйдээбитин иһин 270 тыһыынчаттан тахса солкуобайы ыыппыттар. Бу туһунан ИДьМ пресс-сулууспата иһитиннэрэр.

Сэрэбиэйдьит туһунан биллэрииттэн билбиттэр, төлөпүөнүнэн сибээстэһэн кыһалҕаларын быһаартараары гыммыттар. Биир дьахтар аферистар уорбут харчыларын төнүннэриэн, иккиһэ кырыыһы уһултарыан баҕарбыт. Сэрэбиэйдьит иерусалимскай чүмэчини сакаастыырбар уонна монахиняларга көмөлөһөрбөр харчы наада диэн турбут. Дьахталлар уопсай 270 тыһ. солк. тахсаны ыыппыттар. Түөкүн харчыны ылаат да, сүтэн хаалбыт.

Силиэдэбэтэллэр дьахтары булбуттар. 52 саастаах Самара олохтооҕо эбит. Кини буруйун билиммит уонна харчыны толору төнүннэрбит. Сымыйа сэрэбиэйдьиккэ холуобунай дьыаланы тэрийбиттэр.