Санкт-Петербурга тыйаатыр олимпиадатыгар «Дьырыбына Дьырылыатта» испэктээги көрдөрүөхтэрэ

Санкт-Петербурга ыытыллыахтаах норуоттар икки ардыларынааҕы тыйаатыр олимпиадатыгар Олоҥхо тыйаатыра «Дьырыбына Дьырылыатта» испэктээги көрдөрүө. Литейнэй проспекка тэриллэр киэҥ түһүлгэҕэ сахалар алтынньы 21- 22 күнүгэр иккитэ оонньуохтара.

Тыйаатырга бэлэмнэнии үгэнэ. Труппа номнуо бу 20-с чыыһылаҕа Санкт-Петербурга көтөөрү, кынатын куурдар. Бу — норуоттар икки ардыларынааҕы тыйаатыр олимпиадатыгар аан дойду бары муннугуттан бастыҥ коллективтар тоҕуоруһа мустар түһүлгэлэрэ. Онно Саха сириттэн бастакытын Олоҥхо тыйаатыра кыттыаҕа.

«Дьырыбына Дьырылыатта» олоҥхо аан бастаан 2016 сыллаахха Бүлүүгэ турбута. Салгыы Намҥа оонньообуттар, онтон Саха тыйаатырын үрдүк сыанатыгар сүрэхтээбиттэрэ. Санаттахха, бу испэктээк «Кыһыл көмүс мааска» бириэмийэ түөрт номинациятыгар киирбитэ. Онно дьүүллүүр сүбэ Олоҥхо тыйаатырын бэлиэтии көрөн, тустаах олимпиадаҕа ыҥырбыт.

Бу испэктээк опера курдук диэн артыыстар этэллэр. Пьесаҕа хас биирдии хамсаныы, үҥкүү барыта тойугунан доҕуһуолланар буолан, ордук ыарахан. Ону ол диэбэккэ, артыыстар аһыыр да астарын умнан, күнүстэри-түүннэри тылларын-өстөрүн чочуйаллар, бэлэмнэнэллэр.