Сардаана Авксентьева: мэр быыбарыгар куоластааһын-Дьокуускай куорат дьылҕатын быһаарыы

Өрөспүүбүлүкэ киин куоратын урукку мээрэ Сардаана Авксентьева куорат саҥа баһылыгын быыбарыгар куоластааһын, куорат дьылҕатын быһаарыы буоларын иһитиннэрдэ.

«Дьокуускай олохтоохторугар үс күннээх куоластааһыҥҥа көхтөөх кыттыыны ылалларыгар ыҥырабын, тоҕо диэтэххэ, бу биһиги куораппыт дьылҕатын быһаарыыта. Куораппыт салгыы сайдар, саҥаны арыйар суолун талабыт. Биһиги куораппыт Россияҕа да, аан дойдуга да баар саамай үчүгэй, аныгы уонна бастыҥ уопуту ылара сөптөөх», — диэтэ кини.

Сардаана Авксентьева бүгүн, кулун тутар 26 күнүгэр, куоластаата.

Дьокуускай куорат баһылыгын быыбара кулун тутар 26-28 күннэригэр ыытыллыаҕа. Үс күн устата куоластыыр учаастактар быыбардааччыларга 08:00-20:00 чааска диэри аһаҕас буолуохтара.

Өрөспүүбүлүкэ киин куоратыгар бэлиэтэммит уонна олорор гражданнар куоластыахтарын сөп. Куоласкын олорор сиргинэн быыбардыыр учаастакка эрэ биэриэххэ сөп. Учаастактарга санитарнай- эпидемиологическай куттал суох буолуутун тутуһуу ирдэнэр. Ол курдук, мааскалар, индивидуальнай бэрчээккэлэр, антисептическай сириэстибэлэр баар буолуохтара, термометрия, тэйиччи туттуу көрүллэр.

Учаастагын аадырыһы Дьокуускай куорат территориальнай хамыыһыйатын сайтыгар, бэйэ тус кэбиниэтигэр, эбэтэр 40-80-35 нүөмэринэн билиэххэ сөп.

Учаастакка ханнык эмэ биричиинэнэн кэлэр кыахтара суох дьон дьиэлэриттэн куоластыахтарын сөп. Кинилэр кулун тутар 28 күнүгэр 14:00 чааска диэри учаастактааҕы хамыыһыйаҕа төлөпүөнүнэн эрийиэхтэрин уонна ханнык кэмҥэ куоластыахха сөбүн билсиэхтэрин наада.