Сардаана Трофимова Дьокуускайга кэллэ

Москватааҕы марафоҥҥа өрөгөйдөөх кыайыы кэнниттэн, спортсменка Сардаана Трофимова Дьокуускайга кэллэ.

Балаҕан ыйын 22 күнүгэр рекорду олохтооччуну Дьокуускай аэропордугар үөрүүлээхтик көрүстүлэр.

«Пандемиянан сибээстээн, Россия чемпионата көһөрүллүбүтүнэн сынньанарга сөптөөх бириэмэ баар этэ. Ол кэнниттэн дьарыктанан саҕалаабытым, салгыы Кисловодскайга түмсүүлээх дьарыкка, онтон Москватааҕы марафоҥҥа айаннаабытым. Көрдөрүүбүнэн олус астынным, былааммытын барытын толордубут», — диэн Сардаана Трофимова кэпсээтэ.

Москватааҕы марафон балаҕан ыйын 20 күнүгэр буолла. Саха сирин спортсменката 42,2 килэмиэтир уһуну 2 чаас 28 мүнүүтэ 2 сөкүүндэ иһигэр сүүрэн кэлэн, олимпийскай ирдэбили толордо уонна марафоҥҥа урут олохтообут бэйэтин көрдөрүүтүн тупсаран, рекорд олохтоото.