Сардаана Трофимова Россия чемпионатыгар бэлэмнэнэр

Сардаана Трофимова ахсынньы ыйга Сочига ыытыллыахтаах чемпионакка бэлэмнэнэн саҕалаата. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Бүгүн, алтынньы 1 күнүгэр, Ил Дархан Айсен Николаев, Москватааҕы марафон кыайыылааҕа, международнай кылаастаах спорт маастара Сардаана Трофимованы уонна кини тренерин, Россия спордун үтүөлээх маастара Татьяна Жиркованы кытта көрүстэ.

Трофимова алтынньы ортотугар Киргизияҕа эрчиллэ барарын туһунан кэпсээтэ. Ахсынньы ыйга Сочига Россия чемпионата ыытыллыаҕа, онон дойду сүрүн күрэхтэһиитигэр күүстээх дьарык саҕаланна.

«Үксүгэр сүүрүү сыл аҥарыгар биирдэ ыытыллар. Оттон бу сүүрүү икки ыйынан буолар. Түргэнник чөлгө түһүөххэ наада», — диэтэ.

Билиҥҥи туругунан, Сардаана Трофимова Токио куоракка ыытыллар Олимпийскай оонньууларга кыттар боппуруоһа быһаарыллар. Россияҕа чэпчэки атлетика олимпиадатыгар кыттарга 10 квота баар. Түмүк быһаарыыны Чэпчэки атлетика федерациятын Аан дойдутааҕы ассоциацията ылынар.

Физкультура уонна спорт эйгэтигэр кылаатын, олимпийскай хамсааһын идеятын тарҕатыытын уонна спортка үрдүк ситиһиитин иһин Ил Дархан Сардаана Трофимоваҕа «Саха сирин физическай култууратын уонна спордун үтүөлээх үлэһитэ» бочуоттаах ааты иҥэрдэ.