Сэбиэскэй сойуус Дьоруойа Николай Кондаков 100 сааһа

Аҕа дойду Улуу сэриитин кыттыылааҕа, Сэбиэскэй сойуус Дьоруойа, биллиилээх араадьыйа суруналыыһа Кондаков Николай Алексеевич (12.07.1920-11.07.1979) бүгүн төрөөбүтэ 100 сыла буолла.

Николай Алексеевич 1920 сыллаахха от ыйын 12 күнүгэр Бүлүү оройуонун Дьөккөн нэһилиэгэр төрөөбүт. Бүлүүтээҕи педучилищаны бүтэрбит. Сэрии иннинэ учууталлаабыт. Аармыйаҕа 1942 сыл бэс ыйыгар ыҥырыллыбыта. Артиллерийскай училищаны бүтэрэн баран 1943 сыл ахсынньытыгар фроҥҥа ыытыллыбыт.

Лейтенант Н. А. Кондаков 2-с Украина фронун 1073-с армейскай истребительно-противотанковай артиллерийскай полка огневой взводун хамандыыра буолбута. Аан бастаан Кировоград куоракка сэриилэспитэ. Онтон салгыы Молдавиянан, Румыниянан Яссы куоракка дылы сэриилэһэ-сэриилэһэ барбыта. Онтон 1-кы Украина фронун састаабыгар 5-с гвардейскай аармыйаны кытта Сандомир плацдармыгар сэриигэ кыттыбыта, Одер өрүһү туорааһыҥҥа хорсун быһыыны көрдөрбүтэ. Н. А. Кондаков манна бэйэтин хамаандалыыр взводун кытта Одер арҕаа кытылыгар плацдарм былдьаан ылбыта уонна ону кэҥэппитэ. Бу хорсун быһыытын иһин Дьоруой аатыгар түһэриллибитэ.

Сэбиэскэй Сойуус Дьоруойун аата өлбүтүн кэннэ, 1990 сыллаахха ыам ыйын 5 күнүгэр иҥэриллибитэ.

Сэрии кэнниттэн Кондаков суруналыыстаабыта, тылбаасчыттаабыта, Саха Сирин араадьыйатын кэмитиэтин тутаах эрэдээктэринэн үлэлээбит.

1979 сыл от ыйын 11 күнүгэр өлбүт. Н. А. Кондаков аата Дьөккөн оскуолатыгар иҥэриллибит. Дьоруой аатынан Бүлүү куорат уулуссата ааттаммыт. Дьоруой бүүстэрэ Бүлүү педучилищетын уонна Дьөккөн оскуолатын тастарыгар тураллар. «Саха» НКИХ» Дьокуускай куоракка Николай Кондаков аатынан сквер оҥорбута, пааматынньыгын туруорбута.

Сыл аайы Араадьыйа күнүгэр Сэбиэскэй Сойуус Дьоруойа Николай Кондаков аатынан государственнай бириэмийэ «Саха» НКИХ бастыҥ үлэһиттэригэр  дьоруой пааматынньыгын аттыгар үөрүүлээх быһыыга-майгыга туттарыллар.