«Сээдьэ» үҥкүү ансаамбылын салайааччытыгар холуобунай дьыала тэрилиннэ

НВК САХА – «Сээдьэ» үҥкүү судаарыстыбаннай эстраднай-фольклорнай ансаамбылын дириэктэригэр сыһыаннаан холуобунай дьыала тэрилиннэ.

Салайааччы сулууспалыыр балаһыанньатын туһанан түөкүннээһиҥҥэ буруйданар.

Кини 2017 сыл тохсунньу 1 күнүттэн 2018 сыл ахсынньы 31 күнүгэр диэри ансаамбыл кэнсиэртээбитин туһунан сымыйа отчуоттары Култуура министиэристибэтигэр түһэрбит.

Итини таһынан сымыйанан таабыллаан, бэйэтигэр уонна үлэлээбэт дьоҥҥо хамнас аахтарбыт. Ол түмүгэр үлэлээбэтэх эрээри кэлэктиип асхааныгар киирэ сылдьар дьоҥҥо хамнас төлөммүт. Ол дьон киирбит харчы сорох чааһын дириэктэргэ биэрэ сылдьыбыт. Силиэстийэ салҕанар.

Саха сиринээҕи Силиэстийэлиир управление иһитиннэрбитинэн, холуобунай дьыала Аллараа Халыма улууһунааҕы борокуратуура ыыппыт бэрэбиэркэтин түмүгэр көбүтүлүннэ.