Орто анал үөрэх хаачыстыбатын хааччыйыы боппуруостарын көрдүлэр

СӨ Бырабыыталыстыбатын бэрэссэдээтэлин солбуйааччы Сергей Местников СПО систиэмэтинэн үөрэх хаачыстыбатын хааччыйыы боппуруостарын көрдө. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.

Мунньахха пандемия усулуобуйатыгар үөрэх бырагыраамаларын олоххо киллэрии боппуруостарын дьүүллэстилэр.

42 орто профессиональнай үөрэх тэрилтэлэригэр 205 идэҕэ уонна 7 сүрүн хайысханан идэлэргэ бэлэмнэнии барар. 45,5% устудьуон «инженернэй дьыала, технология уонна техническэй наука» хайысхаларынан компетенциялары баһылыыллар.

Өрөспүүбүлүкэҕэ быйыл алтынньы 1 күнүнээҕи туругунан, 24 086 устудьуон үөрэнэр, 2020 сыллааҕы көрдөрүүнү кытта тэҥнээтэххэ 80 киһинэн улааппыт.

Билигин 30-ча үөрэх тэрилтэлэригэр үөрэтии булкаас форматынан ыытыллар: 9717 устудьуон офлайн, 9666 онлайн. Сэттэ үөрэх тэрилтэтигэр 1920 устудьуон үгэс быһыытынан (очнай ньыманан) үөрэнэр. Биэс үөрэх тэрилтэтигэр 1206 устудьуон кэтэхтэн үөрэнэр.

Сэтинньи 30 күнүнээҕи туругунан 80,29% үлэһит, 71.56% устудьуон COVID-19 утары быһыыны ыллылар. Коллективнай иммунитет олохтонор түгэнигэр устудьуоннар үгэс быһыытынан (очнай ньыманан) үөрэниэхтэрэ. Ол иһин хас биирдии үлэһит, устудьуон баҕа өттүнэн вакцинацияны ааһыахтаах.

Вице-премьер Сергей Местников үөрэх тэрилтэлэрин директордарын иһитиннэриилэрин истэн, үөрэх хаачыстыбатын судаарыстыба стандартарыгар сөп түбэһиннэрэн, үөрэх процеһын уонна устудьуоннар олорор уопсайдарыгар куттал суох буолуутун хааччыйар кэтээн көрүүнү уонна хонтуруолу күүһүрдэргэ сорук туруорда.