Сергей Юнганс СӨ Опера уонна балет тыйаатырын саҥа дириэктэрэ буолла

Свердловскайдааҕы судаарыстыбаннай муусуканан комедия тыйаатырын туруорааччы режиссера Сергей Югнанс Саха сирин Опера уонна балет судаарыстыбаннай тыйаатырын дириэктэрин дуоһунаһыгар аһаҕас күрэх финалиһа буолла.

«Сергей Сергеевич — Россияҕа биллэр исписэлиис, эдэр, эрчимнээх театральнай деятель, Россияҕа уонна тас дойдуларга элбэх туруоруулардаах. Кэлиҥҥи сэттэ сылга Екатеринбурга муусуканан комедия тыйаатырыгар салайааччынан үлэлиир. Дьокуускайга тыйаатыры сайыннарарга туспа көрүүлээх», — диэн бырабыыталыстыба бэрэссэдээтэлэ Владимир Солодов иһитиннэрдэ.

Санатар буоллахха, опера уонна балет тыйаатырын уонна национальнай художественнай түмэл дириэктэрин дуоһунаһыгар атырдьах ыйын 19 күнүттэн аһаҕас күрэс саҕаламмыта. Бу күрэскэ ким баҕарар кыттыан сөптөөҕө.