Сергей Жигунов Уһук Илин олохтоохторун туһугар самоизоляцияттан таҕыста

Арассыыйа үтүөлээх артыыһа, режиссер, продюсер Сергей Жигунов tvoidv.ru порталга самоизоляцияттан тахсыбытын туһунан интервьюга кэпсээтэ. Уһук Илиҥҥэ саҕаламмыт «Великое кино Великой страны» аахсыйа туһунан сиһилии сэһэргээтэ.
Аахсыйа уус-уран салайааччыта Сергей Жигунов этэринэн, бу хамсааһыны Сахалин уобалаһа көҕүлээбит. 2020 сыл бэс ыйын 20 күнүттэн балаҕан ыйын 2 күнүгэр диэри бүтүн Арассыыйа үрдүнэн «Судьба человека» уонна «Простые главные слова» диэн дьиҥнээх олоххо олоҕуран уһуллубут киинэлэри көрдөрүөхтэрэ. Бу киинэлэргэ эдэр артыыстар, сэриигэ суох буолбут ыччат хоһооннорун ааҕыахтара.
«Фестивальга бэйэҥ кыттааччы эбитиҥ буоллар, ханнык үлэҕин ыытыаҥ этэй?» диэн ыйытыкка, Сергей Жигунов маннык хардарар: «Кэрэ оҥоһуулаах, кыраһыабай бэйэлээх, айылҕа анаан айбыт Курилылара миигин олус долгуттулар. Бу манна тиит мастартан ситимнэнэн тиһиллибит тыаны кэрэхсээтим. Кинилэр курдат көстөр быһыылаахтар, улахана суох үрдүктээхтэр. Амур өрүс Хабаровскай куорат киэн туттуута, онтон Камчатка уһуга көстүбэт, дириҥэ биллибэт, киэҥ да киэҥ байҕал! Дойдубут тэбэр сүрэҕэр — Москваҕа уонна Подмосковьеҕа кэрэ көстүү чуумпу, нуһараҥ буоллаҕына, Уһук Илиҥҥэ атын дьикти умсугутар кыахтаах хартыына»!
Санатан эттэххэ, фестивальга кыттарга сайаапкалары «Красиво. ДВ» порталга, tvoidv.ru анал сирэйгэ биэрэллэр. Ким баҕарар кыттыыны ылыан сөп. Кыттааччылары талыы, хас биирдии түһүмэххэ интернет нөҥүө куоластааһын быһыытынан ыытыллар.
Бырайыакка кыттыы бэйэни тургутан көрүү эрэ буолбакка, сыаналаах бириистэр уонна биир мөлөйүөн иһин киирсии буолуоҕа. Ону таһынан, финалистарга маастар-класстары ыытыахтара.
Күрэс балаһыанньатын сиһилии tvoidv.ru портал нөҥүө билсиҥ.