Сэрии бэтэрээнэ Дмитрий Григорьев 93 сааһыгар тыына быһынна

Аҕа дойду Улуу сэриитин бэтэрээнэ, Сунтаар улууһун уонна нэһилиэгин бочуоттаах олохтооҕо Дмитрий Григорьев 93 сааһыгар тыына быһынна. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Ил Дархан Айсен Николаев өрөспүүбүлүкэ салалтатын уонна тус бэйэтин аатыттан Аҕа дойду Улуу сэриитин бэтэрээнин аймахтарыгар уонна чугас дьонугар дириҥ кутурҕанын биллэрдэ.

Григорьев Дмитрий Яковлевич 1927 сыл сэтинньи 3 күнүгэр Сунтаар улууһун 2-с Дьаархан нэһилиэгэр Киһи Күөлэ диэн сиргэ күн сирин көрбүт. Оҕо сааһыттан улахан дьону кытта тэҥҥэ холхуоска үлэлээбит. Сэттэ кылааһы бүтэрэн баран «Буденнай» холкуоска бостууктаабыт

1945 сыл сайын Кыһыл Армия кэккэтигэр ыҥырыллан, биир ый буолан баран Монголия кыраныыссатыгар ыытыллыбат. 41-с стрелковай полк 67-с дивизиятыгар рядовойунан сулууспалаабыт. Ол кэнниттэн кини дивизиятын Маньчжурия нөҥүө Хайларга, Японияны кытта уоттаах кыргыы буола турар сиригэр ыыппыттар.

Сэриигэ бааһыран, контузияланан Чита госпитальыгар эмтэммит. Япония сэриитин кэнниттэн Туркестан байыаннай уокуругар 53-с гвардейскай механизированнай полка анаммыт. Наводчигынан, 53-с гвардейскай полк артиллерийскай дивизионугар 85-с калибрдаах пушка хамандыырын солбуйааччытынан сулууспалаабыт. 1946 сыллаахха Ашхабадка буолбут сир хамсааһынын туоратыыга кыттыыны ылбыт. 1949 сыл ахсынньытыгар демобилизацияламмыт.

Дойдутугар төннөн олохтоох холкуоска үлэлээбит. Улуус бастакы тырахтарыыстарыттан биирдэстэрэ буолар. 1965 сыллаахха улуус киинигэр көһөн, оройуоннааҕы балыыһаҕа слесарьынан үлэҕэ киирбит, онтон суһал көмө биригээдэтин суоппара буолбат. Түөрт сылынан хаһаайыстыба чааһынан кылаабынай быраас солбуйааччытынан анаммыт. Биэнсийэҕэ тахсыар диэри бэтэринээринэй станцияҕа үлэлээбит. Биэнсийэҕэ тахсан баран кэтэх хаһаайыстыба тэринэн сүөһү, сылгы, сибиинньэ, коза иитиитинэн дьарыктаммыт.

Кэргэнэ Марфа Сергеевналыын 63 сыл бииргэ олорбуттар. Биэс оҕолоохтор, 40-тан тахса сэннээхтэр уонна хос сиэннээхтэр. «Улуус бочуоттаах дьиэ кэргэнэ» анал аат иҥэриллибитэ.