Сэтинньи 16 күнүттэн «Кыһын Саха сириттэн саҕаланар» бэстибээл аһыллыаҕа

Сэтинньи 16 күнүттэн сыллата ыытыллар «Кыһын Саха сириттэн саҕаланар» бэстибээл буолуоҕа. Бу туһунан куорат дьаһалтата иһитиннэрэр.

Бэстибээл чэрчитинэн, Instagram @upravlenie_cultury_yakutsk платформаҕа сэтинньи 16 күнүттэн ахсынньы 1 күнүгэр диэри араас куонкурустар, маастар кылаастар уонна тэрээһиннэр ыытыллыахтара.

Сэтинньи 16-тан 29 күнүгэр диэри «Строганина — 2020» хаартыска, «Виртуальный холод» муус, хаар оҥоһук, «Тойон балык» саамай улахан кээмэйдээх балык куонкурустара буолуохтара.

Сэтинньи 23-тэн 27 күнүгэр диэри «Зимняя фантазия» илиинэн оҥоһуктарга маастар-кылаастар ыытыллыахтара. «Серебряная чешуя» норуот айар үлэтин быыстапката сэтинньи 27-тэн 30 күнүгэр диэри буолуоҕа.

Сэтинньи 25-тэн 30 күнүгэр диэри 202-с микрооройуоҥҥа «Северное сияние» муус пааркаҕа куорат иһинээҕи аһаҕас муус уонна хаар оҥоһуктар күрэхтэрэ ыытыллыаҕа. Сэтинньи 25-27 күннэригэр «Бриллианты Якутии» муус оҥоһуктарынан блиц-турнир, оттон харыйа уотун үөрүүлээх уматыы ахсынньы 1 күнүгэр былааннанар.

««Кыһын Саха сириттэн саҕаланар» бэстибээл куорат олохтоохторугар, ыалдьыттарыгар хаһыс да сылын үөрүүнү, саҥа дьыл тыынын бэлэхтиир. Бырааһынньык Россия туризмын биир тутаах тэрээһинэ буолар», — диэн иһитиннэриигэ этиллэр.

2021 сылга тэрээһин үөскээбитэ 10 сылын бэлиэтиэҕэ. Бу сыллар усталарыгар бэстибээл ураты суолталанна, кыттааччыта, ыытыллар тэрээһинэ элбээтэ уонна хаҥаата.