Шашкаҕа Россия чемпионатыгар Саха сирин хамаандата 19 мэтээли ылла

Саха сирин сүүмэрдэммит хамаандата шашкаҕа Россия чемпионатыгар 19 мэтээли ылла.

Шашкаҕа Россия чемпионата балаҕан ыйын 21 күнүттэн алтынньы 1 күнүгэр диэри ыытыллар. Оонньооччу Сандаара Апросимова норуоттар икки ардыларынааҕы шашкаҕа үрүҥ көмүһү уонна боруонсаны, маны таһынан, 17-гэр диэри саастаахтар бөлөхтөрүгэр блиц бырагыраамаҕа уонна нуучча шашкатыгар дьахталлар икки ардыларыгар үһүс миэстэни ылары ситистэ. Нуучча шашкатыгар блиц оонньууга дьахталлар икки ардыларыгар спортсменка Альбина Большакова үһүс миэстэни ылла.

17-гэр диэри саастаах уолаттарга норуоттар икки ардыларынааҕы шашка блиц бырагырааматыгар Алексей Большаков кыһыл көмүс мэтээли ылла. Эмиэ бу саас бөлөҕөр кыргыттарга Марианна Федорова боруонсаны ылары ситистэ.

Блиц бырагыраамаҕа хамаанданан оонньууга Саха сирин сүүмэрдэммит хамаандата Алексей большаков, Айсена Егорова уонна Сандаара Апросимова састааптаах бастакы миэстэ буолла. Оттон түргэн шашкаҕа Айсен Егоров, Ньюргуна Куличкина уонна Марианна Федорова састааптаах хамаандата иккис миэстэни ылла. Хамаанданан оонньуу 17-гэр эрэ диэри саастаах бөлөххө ыытылынна.

Норуоттар икки ардыларынааҕы шашкаҕа Николай Григорьев сүүрбэ саастарыгар диэри бөлөххө үһүс миэстэни, эмиэ бу бөлөххө Елена Кычкина блиц бырагыраамаҕа бастакы миэстэни уонна түргэн оонньууга боруонсаны ыллылар. Блиц бырагыраамаҕа Алина Кардашевская үһүс миэстэ буолла.

Блиц бырагыраамаҕа Ксения Нахова кыһыл көмүс мэтээли уонна 27-гэр диэри саастаах дьахталларга түргэн шашкаҕа боруонсаны ылары ситистэ. Айаал Герасимов чемпионат түргэн бырагырааматыгар эр дьоҥҥо боруонса мэтээли ылла.

Санатан эттэххэ, Николай Стручков чемпионат кыһыл уонна үрүҥ көмүс мэтээллэрин хаһаайынынан буолбута.